main ne baḳhsh di tiri kyuun ḳhata tujhe ilm hai
tujhe di hai kitni kaḌi saza tujhe ilm hai
main samajhta tha tu hai apne husn se be-ḳhabar
tiri ik ada ne bata diya tujhe ilm hai
mujhe zindagi ke qarib le ga.i justuju
mari justuju bhala kaun tha tujhe ilm hai
main ne dil ki baat kabhi na ki tire samne
mujhe umr bhar ye guman raha tujhe ilm hai
vo miri gali jo mire liye hui ajnabi
kabhi vaan the sab mire ashna tujhe ilm hai
mira haal dekh ke puchhne laga kya hua
main ne hans ke sirf yahi kaha tujhe ilm hai
koi baat hai ki kinara-kash huun jahan se
kabhi mahfilon ki main jaan tha tujhe ilm hai
Leave a Reply