Tahir Azeem
main us ki mohabbat se ik din bhi mukar jaata
kuchh aur nahin hota is dil se utar jaata
jis shaam giraftari qismat men miri aa.i
us shaam ki lazzat se main aur bikhar jaata
ḳhushbu ke ta.aqub ne zanjir kiya mujh ko
varna to yahan se main chup-chap guzar jaata
avaz sama.at tak pahunchi hi nahin shayad
vo varna tasalli ko kuchh der Thahar jaata
zehnon ke marasim the ik saath bhi ho jaate
ik raah agar koi divar men kar jaata
tasir nahin rahti alfaz ki bandish men
main sach jo nahin kahta lahje ka asar jaata
ab tere bichhaḌne se ye baat khuli mujh par
to jaan agar hota main jaan se guzar jaata
dil ham ne ‘azim’ apna aseb-zada rakkha
jo ḳhvab janm leta vo ḳhauf se mar jaata
Leave a Reply