akhtar-hoshiyarpuri

Main Us Ka Nam Ghule Paniyon Pe Likhta Kya

main us ka naam ghule paniyon pe likhta kya

vo ek mauj-e-ravan hai kahin pe rukta kya

tamam harf mire lab pe aa ke jam se gae

na jaane main ne kaha kya aur us ne samjha kya

sabhon ko apni gharaz thi sabhon ko apni baqa

mire liye mire nazdik koi aata kya

ubharta chand mira ham-safar tha dariya men

main dubte hue suraj ko muḌ ke takta kya

parinde ghar ki munderon pe aa ke baiTh gae

main ajnabi tha ishara koi samajhta kya

firaq o vasl to tasviren un ke naam ki hain

main in men rang kisi ke lahu se bharta kya

main apne ghar men nahin tha magar kahin bhi na tha

udhar se mujh ko guzarte kisi ne dekha kya

tamam shahr ravan hai mire ta.aqub men

main aap kya mire ghar ki taraf ko rasta kya

ye raushni kabhi pahle na thi yahan ‘aḳhtar’

sitara raat ki palkon pe koi chamka kya

More Poems

Leave a Comment