Asra Rizvi
main tire shahr men phirti rahi maari maari
kabhi gulshan kabhi sahra kabhi vaadi vaadi
raah pur-pench thi tanha.i thi andhiyara tha
bebasi kahti rahi dasht men haadi haadi
uljhanen aur kasak ho ga.i taqdir miri
ḳhanqahon men bhi jhank aa.e hain jaali jaali
chhiḌ gaya phir dil-e-betab par ik saaz naya
ruḳh-e-hasti pe chhalakne lagi laali laali
jaane kaisi ye taḌap hai nahin rukne deti
jo thake mere qadam aah main haari haari
ratjagon ka bhi asar hone laga hai kuchh kuchh
surḳh rahne lagi ankhen miri kaali kaali
husn hi husn tha aur jalve hi jalve har-su
kanpte honTon se kahti rahi vaari vaari
muntazir jis ki rahi us ne to dekha bhi nahin
baaqi sab aa ke mile bazm men baari baari
us ke jaane ke tasavvur se bhar aa.iin ankhen
dil mira lagne laga ḳhud mujhe ḳhali ḳhali
Leave a Reply