Main Shad Tanha Ek Taraf Aur Duniya Ki Duniya Ek Taraf

main ‘shad’ tanha ik taraf aur duniya ki duniya ik taraf

saara samundar ik taraf aansu ka qatra ik taraf

us afat-e-jan ko bhi chehra to dikhana hi na tha

ik samt iisa dam-ba-khud ghash men hai muusa ik taraf

apne samand-e-naz ko ai shahsavar aa chhed kar

saf-basta hazir kab se hain mahv-e-tamasha ik taraf

saaqi baghair ahval ye pahuncha hai mai-khane ka ab

jaam ik taraf hai sar-nigun khali hai miina ik taraf

furqat men sab achchhe rahe dil ka magar ye haal hai

zakhm ik taraf badhta gaya dagh-e-suvaida ik taraf

didar-e-janan ka bhala kyuun kar tahammul ho sake

tirchhi nigahen ek su zulf-e-chalipa ik taraf

vo tegh le ke kahte hain dekhun to haq par kaun hai

main ik taraf ‘shad’ ik taraf saara zamana ik taraf

Leave a Comment