main ḳhuda bhi to nahin kyuun mujhe tanha likh de
ab mire naam ki suuli pe masiha likh de
aise sannaTe se behtar hai shikaston ki sada
meri miTTi men ik uḌta hua patta likh de
de vo unvan ki zarurat na kahani ki paḌe
baghban sabze pe ḳhakistar-e-ghuncha likh de
raat bhar tere ujalon ki qasam kha.un main
tu sar-e-sham mari sham.a ka bujhna likh de
ho chuke ḳhushk miri aankh ke chashme kab ke
samne dasht hai ik abr ka TukḌa likh de
phuul ka zikr bhi karte hue Dar lagta hai
phir na tu meri zaban par kahin kanTa likh de
daagh us ek kali ka na miTega hargiz
meri jholi men agar baagh bhi saara likh de
saans lete hue raakh uḌti hai ab chehre par
na bujha aag magar saath hi chashma likh de
bevafa.i ki shikayat use kya logon se
jis ki rahon men tu bachhḌa hua pyara likh de
ab to is aas pe jiite hain ki shayad ‘hashami’
likhne vaale ne jo ab tak nahin likkha likh de
Leave a Reply