Bashir Farooqi
main jitni der tiri yaad men udaas raha
bas utni der mira dil bhi mere paas raha
ajab si aag thi jalta raha badan saara
tamam umr vo honTon pe ban ke pyaas raha
mujhe ye ḳhauf tha vo kuchh saval kar dega
main dekh kar bhi use us se na-shanas raha
tamam raat ajab intishar men guzri
tasavvurat men dahshat rahi hiras raha
gale laga ke samundar hasin kashti ko
sukut-e-tira-faza.i men bad-havas raha
‘bashir’ main use kis tarha be-vafa kah duun
nigah ban ke jo is dil ke aas paas raha
Leave a Reply