Iqbal Tariq
main jabr-e-shauq men kya kaghazon pe likhta raha
tiri gali ki hava kaghazon pe likhta raha
tire jamal ki kirnen tire ḳhayal ki lau
main raushni ka pata kaghazon pe likhta raha
husul-e-rizq bhi lazim tha aur mohabbat bhi
main nan-e-shab ka gada kaghazon pe likhta raha
rida-e-ishq jise bhi ata hui tujh se
faqir ban ke tira kaghazon pe likhta raha
tire firaq ka suraj mujhe jalata raha
main sher kahta raha kaghazon pe likhta raha
mire labon se kabhi aah tak nahin nikli
bas apna karb-o-bala kaghazon pe likhta raha
shu.ur-e-zat ka irfan pa liya jis ne
vo misl-e-sham.a jala kaghazon pe likhta raha
na jaane kitni dua.en hi main ne mangin aur
jo mangni thi dua kaghazon pe likhta raha
yahi zamana mujhe kal kahega sha.ir sa
na jaane kaun tha kya kaghazon pe likhta raha
tamam raat hi ankhon men kaT ga.i ‘tariq’
main apni maan ki dua kaghazon pe likhta raha
Leave a Reply