Main DhunD Lun Agar Us Ka Koi Nishan Dekhun

maiñ DhūñD luuñ agar us kā koī nishāñ dekhūñ

buland hotā fazā meñ kahīñ dhuāñ dekhūñ

abas hai sochnā lā-intihā ke baare meñ

nigāheñ kyuuñ na jhukā luuñ jo āsmāñ dekhūñ

bahut qadīm hai matrūk to nahīñ lekin

havā jo ret pe likhtī hai vo zabāñ dekhūñ

hai ek umr se ḳhvāhish ki duur jā ke kahīñ

maiñ ḳhud ko ajnabī logoñ ke darmiyāñ dekhūñ

ḳhayāl tak na rahe rā.egāñ guzarne kā

agar ‘malāl’ in āñkhoñ ko mehrbāñ dekhūñ

Leave a Comment