main barash chhoḌ chuka aḳhiri tasvir ke ba.ad
mujh se kuchh ban nahin paaya tiri tasvir ke ba.ad
mushtarak dost bhi chhuTe hain tujhe chhoḌne par
ya.ani divar haTani paḌi tasvir ke ba.ad
yaar tasvir men tanha huun magar log mile
ka.i tasvir se pahle ka.i tasvir ke ba.ad
dusra ishq mayassar hai magar karta nahin
kaun dekhega purani na.i tasvir ke ba.ad
bhej deta huun magar pahle bata duun tujh ko
mujh se milta nahin koi miri tasvir ke ba.ad
ḳhushk divar men silan ka sabab kya hoga
ek adad zang lagi kiil thi tasvir ke ba.ad
Leave a Reply