chhuTe ye dhund nazar aa.e abr-para koi
tumhare naam ka chamke kahin sitara koi
bhaḌak uThenge agar ham baḌa ghazab hoga
hamara raakh men DhunDo na tum sharara koi
tumhare sher men kyuun bu-e-raftagan hai bahut
tumhare ba.ad hi samjha ye isti.ara koi
hui thi dosti jis se vo kar gaya hijrat
hamara naf.a men yuun dekh le ḳhasara koi
vo apni saari imarat ko tyaag de ke gaya
kahan se kis ne kiya sochiye ishara koi
tiri zamin men likkhe hain sher tere liye
tiri zamin pe nahin hai mira ijara koi
na jaane kyuun mujhe chubhta hai aj-kal ‘hamdam’
miri hi aankh se likkha hua nazara koi
Leave a Reply