chhuTe Ye Dhund Nazar Aae Abr-Para Koi

chhuTe ye dhuñd nazar aa.e abr-pāra koī

tumhāre naam kā chamke kahīñ sitārā koī

bhaḌak uTheñge agar ham baḌā ġhazab hogā

hamārā raakh meñ DhūñDo na tum sharārā koī

tumhāre sher meñ kyuuñ bū-e-raftagāñ hai bahut

tumhāre ba.ad hī samjhā ye isti.ārā koī

huī thī dostī jis se vo kar gayā hijrat

hamārā naf.a meñ yuuñ dekh le ḳhasārā koī

vo apnī saarī imārat ko tyaag de ke gayā

kahāñ se kis ne kiyā sochiye ishārā koī

tirī zamīn meñ likkhe haiñ sher tere liye

tirī zamīñ pe nahīñ hai mirā ijārā koī

na jaane kyuuñ mujhe chubhtā hai āj-kal ‘hamdam’

mirī hī aañkh se likkhā huā nazārā koī

Leave a Comment