mahshar ka hamen kya gham isyan kise kahte hain
palle pe vo but hoga mizan kise kahte hain
ushshaq phire dar-dar aivan kise kahte hain
sar baar raha tan par saman kise kahte hain
vasl-e-but-e-mahru hai sharb-e-mai-e-gulgun hai
phir aur inayat-e-yazdan kise kahte hain
qaidi rahe vahshat men be-khud the magar aise
ye bhi na khula ham par zindan kise kahte hain
insan ka bas nafs-e-ammara mukharrab hai
la-haul vala quvvat shaitan kise kahte hain
mahtab tire aage nikla to nujumi ko
sabit na hua mah-e-taban kise kahte hain
bimar-e-mohabbat hain mar jaaen to achchha hai
qurban atibba ke darman kise kahte hain
kyunkar na hansen sun kar hal-e-dil ashiq ko
kamsin hain vo kya janen arman kise kahte hain
ai vaizo ye baten achchhi nahin gunjalak ki
koi jo kabhi samjhe iman kise kahte hain
dekhen to khizar tere ab-e-dam-e-khanjar ko
maalum nahin ab-e-haivan kise kahte hain
haan dast-e-junun sau sau zanjir ki tukde hon
sansi kise kahte hain sohan kise kahte hain
be-yar ye badal hain dal shaam ki faujon ke
bauchhar hai tiron ki baran kise kahte hain
ham aap ke ghar aa kar farmaiye jaenge
achchhi rahi lo suniye mehman kise kahte hain
jab dekhte hain gul ko kahte hain vo shokhi se
roti hui surat hai khandan kise kahte hain
be-khud khalish-e-gham se hote hain to kahte hain
ai dil ye khatak kya hai mizhgan kise kahte hain
divar ko zindan ki pathra gae divane
jis dam ye khayal aaya maidan kise kahte hain
aine ke saath apni surat unhen dikhlaen
dekhen to vo dono men hairan kise kahte hain
shohra hai ‘saba’ ab to apni bhi fasahat ka
‘atish’ ke muqallid hain sohban kise kahte hain
Leave a Reply