mahki shab a.ina dekhe apne bistar se bahar
ḳhvab ka aalam reza reza chashm-e-manzar se bahar
hashr sada hai parvazon men ruui ke gaale unche pahaḌ
asman ik shishe ka TukḌa vaqt ke shahpar se bahar
ḳhuun ugalta jism shafaq si phuli ankhon ankhon men
qaus-e-quzah ke nazuk baazu dast-e-ḳhanjar se bahar
zehn-o-nazar men andar andar phulte-phalte mausam-e-gul
ḳhushbu ḳhushbu lafz ke jaadu rang lab-e-tar se bahar
tashbihen pechida kina.e do-alam ke razm-o-ilm
ghaur se dekho kuchh bhi nahin us husn ke paikar se bahar
Leave a Reply