magar vo diid ko aaya tha baagh men gul ke
ki bu kuchh aur main paai dimagh men gul ke
adu bhi ho sabab-e-zindagi jo haq chahe
nasim-e-subh hai roghan charagh men gul ke
chaman khilen hain pahunch baada le ke ai saaqi
girafta-dil mujhe mat kar faragh men gul ke
nahin hai ja-e-tarannum ye bostan ki nahin
sivae khun-e-jigar mai ayagh men gul ke
ali ka naqsh-e-qadam dhundhta hai yuun ‘sauda’
phire hai bad-e-sahar juun suragh men gul ke
Leave a Reply