Fani Badayuni
lutf o karam ke putle ho ab qahr o sitam ka naam nahin
dil pe ḳhuda ki maar ki phir bhi chain nahin aram nahin
jitne munh hain utni baten dil ka pata kya ḳhaak chale
jis ne dil ki chori ki hai ek usi ka naam nahin
jalva o dil men farq nahin jalve ko hi ab dil kahte hain
yaani ishq ki hasti ka aghaz to hai anjam nahin
ruk ke jo sansen aa.iin ga.iin maana ki vo aahen thiin lekin
aap ne tevar kyuun badle aahon men kisi ka naam nahin
ishq ke azari bhi kahin mar jaane se ji jaate hain
le ye tasalli rahne de ai maut ye tera kaam nahin
kab se paḌi hain dil men tere zikr ki saari rahen band
barson guzre is basti men rasm-e-salam-o-payam nahin
had thi ye betabi-e-dil ki janiye ab kya hona hai
sabr ki had bhi hone aa.i sub.h nahin ya shaam nahin
dil pe apna bas nahin chalta un ki shikayat kya kiije
aap ham apne dushman Thahre dost pe kuchh ilzam nahin
dil se kisi ki ankhon tak kuchh raaz ki baten pahunchi hain
aankh se dil tak aaya ho aisa to koi paigham nahin
naza.a men ‘fani’ tu ne ye kis ka chupke chupke naam liya
kyuun o kafir teri zaban par ab bhi ḳhuda ka naam nahin
Leave a Reply