lu ke mausam men baharon ki hava mangte hain
ham kaf-e-dast-e-khizan par bhi hina mangte hain
ham-nashin sada-dili-ha-e-tamanna mat puchh
be-vafaon se vafaon ka sila mangte hain
kaash kar lete kabhi kaaba-e-dil ka bhi tavaf
vo jo patthar ke makanon se khuda mangte hain
jis men ho satvat-e-shahin ki parvaz ka rang
lab-e-shair se vo bulbul ki nava mangte hain
taaki duniya pe khule un ka fareb-e-insaf
be-khata ho ke khataon ki saza mangte hain
tirgi jitni badhe husn ho afzun tera
kahkashan maang men mathe pe ziya mangte hain
ye hai varaftagi-e-shauq ka aalam ‘sardar’
barish-e-sang hai aur bad-e-saba mangte hain
Leave a Reply