log kuchh rah-e-mohabbat men Thahar ja.enge
ham kahan vo hain jo ḳhatrat se Dar ja.enge
jante hi nahin ye zaḳhm diye hain kis ne
log dete hain tasalli ki ye bhar ja.enge
us ne ye kah ke bandha.i hai miri himmat-e-dil
aa.e hain gham ke zamane ye guzar ja.enge
der se a.enge vo dil mira kahta hai yahi
ulTe munh par ka.i ilzam vo dhar ja.enge
us ke aane ke to imkan nazar aate hi nahin
isi ummid men sab shaam sahar ja.enge
thoḌi si dar-e-mohabbat ki zarurat hai ‘suhail’
jo jarasim hain nafrat ke vo mar ja.enge
Leave a Reply