log kahte hain mohabbat men asar hota hai
kaun se shahr men hota hai kidhar hota hai
us ke kuche men hai nit surat-e-bedad na.i
qatl har ḳhasta ba-andaz-e-digar hota hai
nahin ma.alum ki matam hai falak par kis ka
roz kyuun chaak gireban-e-sahar hota hai
vuhin apni bhi hai barik-tar-az-mu gardan
tegh ke saath yahan zikr-e-kamar hota hai
kar ke main yaad dil apne ko bahut rota huun
jab kisi shaḳhs ka duniya se safar hota hai
us ki mizhgan ka koi naam na lo kya hasil
mera in baton se suraḳh jigar hota hai
‘mus.hafi’ ham to tire milne ko aa.e ka.i baar
ai divane tu kisi vaqt bhi ghar hota hai
Leave a Reply