Poet
likha khat use le qalam aur kaghaz
jale ishq-e-sozan se ham aur kaghaz
na rakh dida-e-tar pe maktub us ka
mukhalif hain aapas men nam aur kaghaz
khuda se bhi dar likh na ahval dil ka
divane ye soz-e-raqam aur kaghaz
likha safha-e-dil pe maktub tujh ko
na tha tere laaeq sanam aur kaghaz
mire dil ko ai chashm naame ka us ke
khush aata hai husn-e-raqam aur kaghaz
zara der tere jo tham jaaen aansu
rahe haath men koi dam aur kaghaz
jo kuchh safha-e-dil men apne hai ‘joshish’
rakhe hai ye khubi to kam aur kaghaz
Leave a Reply