Mera Badan Hai Magar Mujhse Ajnabi Hai Abhi

mira badan hai magar mujh se ajnabi hai abhi

mire khayal se mujh men koi kami hai abhi

sahar sahar na pukaro dubak ke so jaao

tumhare hisse ki shab to bahut padi hai abhi

na puchho kaise huiin Dher ghar ki divaren

vo ik sada usi malbe men ghumti hai abhi

vo jis ki lahron ne sadiyon ka farq Daal diya

hamare beach men haail vahi nadi hai abhi

main thak gaya huun mujhe ek lamha sone do

main janta huun ki manzil bahut padi hai abhi

main us ke vaste suraj kahan se akhir laun

na jaane raat mujhe kya samajh rahi hai abhi

na jaane kab se safar men thi us ko mat chhedo

ye gard mere badan par zara jami hai abhi

vo main nahin tha vo meri sada thi galiyon men

ki mere paanv men zanjir to padi hai abhi

na jaane vaqt kab album samet le apna

ye tez tez hava yuun to chal rahi hai abhi

Leave a Comment