Lihaz Karte Adab Ehtiram Karte Hue

Rukhsaar Nazimabadi

lihaz karte adab ehtiram karte hue

guzar raha huun mohabbat ko aam karte hue

ye raat aa ke mujhe phir se joḌ deti hai

main TuuT jaata huun din iḳhtitam karte hue

baghair zad-e-safar ham pahunch ga.e manzil

bhaTakte girte sambhalte qayam karte hue

kisi ka koi bhi kirdar rah na jaa.e kahin

ḳhayal rakhna kahani tamam karte hue

mira zamir malamat kare hai yuun mujh par

mujhe jo dekhe hai tujh ko salam karte hue

ye mere pusta-e-jan men shigaf the lekin

kisi ne dekha nahin rok thaam karte hue

vo baat baat pe naraz hone lagta hai

so ḳhauf aata hai us se kalam karte hue

koi mazaq nahin umr bhar ki mehnat ko

kaleja chahiye ghairon ke naam karte hue