Mahesh Chandra Naqsh
lau de uTha charagh-e-tamanna bujha hua
guzra ye aaj kaun idhar dekhta hua
ye hadsat bhi to guzarne zarur the
ai ishq kyuun udaas hai jo kuchh hua hua
vo rang kya hue vo baharen kidhar ga.iin
ai ham-safir saara chaman hai luTa hua
yuun aaj be-qarar hai duniya-e-arzu
jis tarah tilmila.e koi dil dukha hua
kyuun aaj bazm-e-zist men be-kaifiyan si hain
ai husn teri mast-nigahi ko kya hua
girdab-e-gham hai aur miri kashti-e-umid
phir bahr-e-zindagi men hai tufan uTha hua
apna pata na jada-e-manzil ki kuchh ḳhabar
ḳhud miT gaya huun ‘naqsh’ unhen DhunDhta hua
Leave a Reply