lams-e-tishna-labi se guzri hai
raat kis jan-kani se guzri hai
us murassa nigar-khane men
aankh be-manzari se guzri hai
ek saaya sa phadphadata hai
koi shai raushni se guzri hai
lutne vaale saath saath rahe
zindagi sadgi se guzri hai
kuchh dikhai nahin diya shayad
umr andhi gali se guzri hai
shaam aati thi din guzarne par
kya hua kyuun abhi se guzri hai
kitni hangama-kheziyan le kar
ik sada khamushi se guzri hai
aankh binai ke taaqub men
kaisi la-hasili se guzri hai