Bharat Bhushan Pant
laakh Takrate phiren ham sar dar-o-divar se
ji ki bharta hi nahin hai lazzat-e-azar se
kuchh to ghar valon ne ham ko kar diya ma.azur sa
aur kuchh ham fitratan ukta ga.e ghar-bar se
yak-ba-yak aisi bhi sab par kya qayamat aa ga.i
shahr ke sab log kyuun lagne lage bimar se
tere sapnon ki vo duniya kya hui us ko bhi dekh
ho chuki hain nam bahut ankhen uTha aḳhbar se
muntazir tha Dubne vaale ka koi to zarur
ik sada aa.i thi us ke naam dariya paar se
sab se achchha to yahi ”ghalib” tira jam-e-sifal
TuuT bhi jaa.e to phir le aa.iye bazar se
Leave a Reply