ab kaho karvan kidhar ko chale
raste kho ga.e charag jale
ansuon men naha ga.iin ḳhushiyan
ruuTh kar jab vo aa lage hain gale
ishq gham ko ubuur kar na saka
raste karvan ke saath chale
ham pe guzri hain hijr ki raten
ham jahannam men the magar na jale
the mohabbat ki ibtida ke qusur
vo tabassum jo ansuon men Dhale
ḳhaak se sainkaḌon uge ḳhurshid
hai andhera magar charag-tale
chand sakit hai ruk ga.e taare
ab vo aa.en to gham ki raat Dhale
mai-kade ka to zikr bhi hai gunah
ab hayat-e-haram paḌi hai gale
pursish-e-hal ka javab tha kya
hans paḌe ham ki jald baat Tale
Leave a Reply