avvalin shart hai insan ka insan hona
ba.ad ki baat hai hindu ya musalman hona
jo bhi aata hai vo kaliyon ko masal jaata hai
ik hasin khel hai gulshan ka nigahban hona
ahl-e-danish ne kabhi ḳhvab men socha bhi na tha
jurm ban ja.ega is daur men insan hona
adl hai maslahat-e-vaqt ke panje se asiir
saḳht mushkil hai yahan sahab-e-iman hona
jashn-e-be-chargi jis vaqt manate hon avaam
na-munasib sa hai us vaqt ghazal-ḳhvan hona
ban gaya jehl ke baḌhne ka sabab ai ‘ishrat’
yak-ba-yak ilm ki sham.a ka farozan hona
Leave a Reply