lagta hai pech-o-tab ke aage kuchh aur hai
is shor-e-inqalab ke aage kuchh aur hai
be-shak mire saval ke pichhe hai aur baat
kya tere is javab ke aage kuchh aur hai
har chand meri ankhon ne dekha nahin hunuz
lekin tilism-e-ḳhvab ke aage kuchh aur hai
jo tujh se ḳhush-jamal hai aur dil-fareb bhi
duniya tire shabab ke aage kuchh aur hai
uḌta hua uqaab to ankhon men qaid hai
ab dekhiye uqaab ke aage kuchh aur hai
haan jis se us zamin ka tavazun hai barqarar
din raat ke azaab ke aage kuchh aur hai
parda paḌa hua hai miri aankh par talab
ya barq-o-aftab ke aage kuchh aur hai
Leave a Reply