chahat ghamze jata rahi hai
vahshat sahra dikha rahi hai
ghunchon ka jigar hila rahi hai
bulbul kya gul khila rahi hai
yusuf ka pata laga rahi hai
khushbu kanan men aa rahi hai
shirin kya rang la rahi hai
ashiq ka lahu baha rahi hai
kis shokh ko dijiye dil-e-zar
kis men sahab vafa rahi hai
avaza-e-faiz hai jahan men
jis ki shohrat sada rahi hai
daain hai pari-vashon ki furqat
dil kha ke kaleja kha rahi hai
jaan nazar hui pari-rukhon ki
mitti ko hava uda rahi hai
chahat ki kashish ne lo dubo di
yusuf ko kunen jhuka rahi hai
dil men jo base hue hain gul-ru
surkhi aankhon men chha rahi hai
gahta huun jabin ko pa-e-but se
taqdir likha mita rahi hai
hanste hue dekh kar gulon ko
shabnam aansu baha rahi hai
andher ka aaj samna hai
surma vo pari laga rahi hai
kyuun jaan nahin nikalti ‘agha’
kaise sadme utha rahi hai
Leave a Reply