donon taraf hi barson ye silsile rahe the
kuchh vo the bad-guman se kuchh ham khinche rahe the
jin ko mire junun se kuchh vasta nahin tha
muḌ muḌ ke meri janib kyuun dekhte rahe the
tujh par ḳhuda ki rahmat ai dil hai ye haqiqat
jab tak na tha tira gham ham chain se rahe the
vo gulshan-e-mohabbat taraj ho gaya kya
kal tak jo ḳhun-e-dil se ham sinchte rahe the
ham ko tabah kar ke kitne sukun se hain
ham muztarib hamesha jin ke liye rahe the
dekha jo aaj un ko hairan rah ga.e sab
kya kya na log ham ko ilzam de rahe the
aao ki ittifaqan tum bhi ho aaj tanha
ham bhi hujum-e-gham men aksar ghire rahe the
kya kya ḳhayal aa.e firdaus-e-hosh ban kar
kitne hasin aza.em dil men chhupe rahe the
vo din bhi yaad hain jab ye haal tha ki ham par
hansti rahi thi duniya ham dekhte rahe the
itna to yaad hai jab vo ho rahe the ruḳhsat
ta-der dil hi dil men kuchh sochte rahe the
hairan huun ki un ko kya ho gaya hai jaane
sahil se jo musalsal avaz de rahe the
ik inqalab aḳhir aa hi gaya jahan men
soti rahi thi duniya ham jagte rahe the
lo dekh lo hain mere qadmon men sar-ba-sajda
ye but ki jin ko kal tak sab pujte rahe the
guzre the ham bhi ‘rahi’ ik maqtal-e-vafa se
kuchh log chal base the kuchh saans le rahe the
Leave a Reply