azab-e-did men ankhen lahu lahu kar ke
main sharmsar hua teri justuju kar ke
khanDar ki tah se burida-badan saron ke siva
mila na kuchh bhi ḳhazanon ki aarzu kar ke
suna hai shahar men zaḳhmi dilon ka mela hai
chalenge ham bhi magar pairahan rafu kar ke
masafat-e-shab-e-hijran ke ba.ad bhed khula
hava dukhi hai charaghon ki aabru kar ke
zamin ki pyaas usi ke lahu ko chaaT ga.i
vo ḳhush hua tha samundar ko aabju kar ke
ye kis ne ham se lahu ka ḳhiraj phir manga
abhi to so.e the maqtal ko surḳh-ru kar ke
julus-e-ahl-e-vafa kis ke dar pe pahuncha hai
nishan-e-tauq-e-vafa zinat-e-gulu kar ke
ujaaḌ rut ko gulabi bana.e rakhti hai
hamari aankh tiri diid se vuzu kar ke
koi to habs-e-hava se ye puchhta ‘mohsin’
mila hai kya use kaliyon ko be-numu kar ke
Leave a Reply