Zakir Khan Zakir
ḳhayal-o-ḳhvab men Duubi divar-o-dar banati hain
kunvari laḌkiyan aksar hava men ghar banati hain
kabhi ghamza kabhi ishva kabhi shoḳhi kabhi masti
ada.en bankpan men sandali paikar banati hain
hisen anchal men pinhan kahkasha.en raat hone par
ghani zulfon pe raqsan dilruba manzar banati hain
jhuki palkon pe Thahre ansuon par ho guman aisa
ki jaise sipiyan aghosh men gauhar banati hain
mohabbat ka karishma hai ki ulfat ki karamat hai
hasina.en taḳhayyul men mah-o-aḳhtar banati hain
lagegi paar kaise kashti-e-dil soch lo ‘zakir’
talatum-ḳhez nazren roz jab saghar banati hain
Leave a Reply