Poet
lafzon ka ye ḳhazana tire naam kab hua
ye sher kab kahe tujhe ilham kab hua
ye baat Thiik hai ki mujhe daam kam mile
chupke se bik gaya huun main nilam kab hua
kaisi sharab huun ki hai tishna mire hi lab
apne liye main durd-e-tah-e-jam kab hua
ye hai mira nasib ki shohrat nahin mili
lekin koi bata.e ki bad-nam kab hua
aata raha huun yaad main us ko tamam umr
is zaviye se ishq men nakam kab hua
vo hadse ki zehn hi mafluj ho ga.e
ye bhi nahin hai yaad ki kohram kab hua
ab ho raha hai zikr-e-musavat har taraf
logon ko ilm hai ye chalan aam kab hua
Leave a Reply