Labon Ki Jumbish Nawa-E-Bulbul Hai shoKH Lahja Tera Qayamat

Zakir Khan Zakir

labon ki jumbish nava-e-bulbul hai shoḳh lahja tira qayamat

daraz qamat ghazal ankhen gulab chehra tira qayamat

ghaTa.en zulfen ḳhumar palken mahin anchal pe mah-o-anjum

suhani raton ki chandni men hai chhat pe jalva tira qayamat

zamin-e-dil par ada-e-dilbar chala.e nashtar uTha.e mahshar

nazar uThana nazar jhukana har ek harba tira qayamat

gulon ki laali shagufta aariz pe fasl-e-gul ki safir Thahri

nashile lab ki halavaton se dhaḌakta naghma tira qayamat

jo tu ne khole hava men gesu mahak uTha hai tamam gulshan

hasin sumbul ke darmiyan hai damakta chehra tira qayamat

tire shabistan ke goshe goshe men raushni ka zuhur har-pal

aqidaton ke diye se raushan nafis kamra tira qayamat

kanval badan par machalti sansen chhalakte saghar ki tarjuman hai

gudaz banhen surahi gardan sarapa naqsha tira qayamat

vafa.en mujh se jafa.en mujh se ada.en har-pal yahi hain ‘zakir’

kabhi hai ghamza kabhi hai ishva ye naaz naḳhra tira qayamat