Jameel Yusuf
bhiiḌ aisi hai ki mujh ko rasta milta nahin
gul koi khilta nahin sho.ala koi uThta nahin
ai mire shauq-e-talab tere junun ki ḳhair ho
tu ne kya had-e-nigah ka fasla dekha nahin
ai ghurur-e-husn main tere badan ka aks huun
mahv-e-hairat huun ki tu ne mujh ko pahchana nahin
ek pal men ye rida-e-ab men chhup ja.engi
rang ki lahron ke pichhe bhagna achchha nahin
dil jahan le jaa.e dil ke saath jaana chahiye
is se baḌh kar aur koi rahnuma hota nahin
jis ke jalvaon ne azal se muztarib rakkha mujhe
vo to mere samne bhi aaj tak aaya nahin
Leave a Reply