Bismil Arifi
kuchh aisa hua be-sar-o-saman miri jaan
duniya mujhe kahne lagi nadan miri jaan
sho.alon ko mayassar kahan shabnam ki rifaqat
ḳhud ko na karo aise bhi halkan miri jaan
tanha.i men ab un ka bhi dam ghuTne laga hai
hijrat ko samajhte the jo asan miri jaan
ab teri inayat ho ki duniya ki navazish
dil ho to gaya vaise ye viran miri jaan
nadan hai tu aur ye siyahkar zamana
is daur ke insan ko pahchan miri jaan
dil chahta ye hai ki tujhe duur se dekhun
lekin jo taqaze ka hai tufan miri jaan
dekha tha faqiron ki qaba men use kal tak
sab log jise kahte hain sultan miri jaan
Leave a Reply