la ik ḳhum-e-sharab ki mausam ḳharab hai
kar koi inqalab ki mausam ḳharab hai
zulfon ko be-ḳhudi ki rida men lapeT de
saaqi pa.e-shabab ki mausam ḳharab hai
jam-o-subu ke hosh Thikane nahin rahe
mutrib uTha rubab ki mausam ḳharab hai
ghunchon ko e’tibar-e-tulu-e-chaman nahin
ruḳh se ulaT naqab ki mausam ḳharab hai
ai jaan! koi tabassum-e-rangin ki vardat
phika hai mahtab ki mausam ḳharab hai
Leave a Reply