Anjum-O-Mehr-O-Gul-O-Barg-O-Saba Kuchh Bhi Nahin

Dil Ayubi

anjum-o-mehr-o-gul-o-barg-o-saba kuchh bhi nahin

ḳhuub dekha ba-ḳhuda ghair-e-ḳhuda kuchh bhi nahin

vahshat-o-masti-o-hairat ke siva kuchh bhi nahin

hai jise us ka pata apna pata kuchh bhi nahin

hasti-e-alam-e-hushiyar ho ki ho apna vajud

sab kuchh ik vahm-e-musalsal ke siva kuchh bhi nahin

ishq to zinda-e-javed bana deta hai

ishq ke baab men mafhum-e-fana kuchh bhi nahin

kab se hai kaun hai kyuun hai vo kahan hai kya hai

zat-e-be-chun men ye sab chun-o-chara kuchh bhi nahin

aur sab kuchh ho zamane ko mubarak ai ‘dil’

yaan to daman men mohammad ke siva kuchh bhi nahin