Daman-E-Arzu Ke Kinare Samette

daman-e-arzu ke kinare samette

milta hai kab kisi ko vo sab kuchh jo chahiye

hote hain kuchh sharar bhi chhupe raakh men kahin

hai dekhne men sard sambhal kar kurediye

sab raushni ke phuul to khilte hi bujh gae

kadva dhuan ab ankhon se ro ro nikaliye

mushkil-pasand apni tabiat hai kya karen

chun chun ke khaar rahon men khud ham ne dhar diye

milta hai sard-rui se mah tund-khu hai mehr

apne liye kiran koi ab kis se mangiye

hasrat se su-e-dar ye take jaana ta bike

an-thak ke chor ankhon ko ab sone dijiye

qindil men shagufon ke jalne lagi hava

raushan hain shakh shakh pe khushbu bhare diye

haan mil liye the us se kahin ittifaq se

duniya ne kaise kaise fasane bana liye

‘bilqis’ liije hosh ke nakhun bahut hua

jazbat ko shu.ur ki had de ke rokiye

Leave a Comment