Hasan Abbas Raza
kisi ke hijr men yuun TuuT kar roya nahin karte
ye apna ranj hai aur ranj ka charcha nahin karte
juda.i ki ruton men suraten dhundlane lagti hain
so aise mausamon men aa.ina dekha nahin karte
ziyada se ziyada dil bichha dete hain raste men
magar jis ne bichhaḌna ho use roka nahin karte
hamesha ik masafat ghumti rahti hai paanv men
safar ke ba.ad bhi kuchh log ghar pahuncha nahin karte
tani rassi pe dariya paar utarna hi muqaddar ho
to phir sinon men gharqabi ka Dar rakkha nahin karte
hamen rusva kiya is niind men chalne ki aadat ne
vagarna jagte men ham kabhi aisa nahin karte
‘hasan’ jab laḌkhaḌa kar apne hi paanv pe girna ho
to phir eḌi pe itni der tak ghuma nahin karte
Leave a Reply