Shahid Kabir
kya farz hai ye jism ke zindan men saza de
main ḳhaak agar huun to havaon men uḌa de
ik umr se mahsus kiye jaata huun ḳhud ko
koi mujhe chhukar mire hone ka pata de
main jumbish-e-angusht men mahfuz rahunga
har chand mujhe ret pe tu likh ke miTa de
ujḌa hua ye peḌ bhi de ja.ega manzar
sukhi hui shaḳhon main koi chand phansa de
tu jis ke tasavvur men mila karta hai mujh se
us shaḳhs se meri bhi mulaqat kara de
bahti hui is bhiiḌ ke tufan men ‘shahid’
kis lahr ko pakḌe koi aur kis ko sada de
Leave a Reply