Aziz Lakhnavi
kyuun na ho shauq tire dar pe jabin-sa.i ka
us men jauhar hai miri a.ina-sima.i ka
tuur kushta hai usi naz-e-ḳhud-ara.i ka
barq ki lahr hai naqsha tiri angḌa.i ka
ishq ik tabsira hai husn ki ra.ana.i par
husn ik falsafa hai ishq ki rusva.i ka
aaj ik ḳhaak ka zarra bhi nahin baaqi hai
dil-e-barbad ye hasil hai ḳhud-ara.i ka
yad-e-ayyam ki thi lab pe mire mohar-e-sukut
ab to matam hai bapa dil men shakeba.i ka
mauj-dar-mauj ravan bada-e-sar-josh-e-shabab
alam-e-kaif hai aalam tiri angḌa.i ka
hasrat-o-yas ka amboh magar main bekas
aise majme.a men ye aalam miri tanha.i ka
tirgi sham-e-lahad ki hai bhayanak lekin
hai ye utra hua jaama shab-e-tanha.i ka
jazr-o-mad husn ke dariya men nazar aata hai
qabil-e-did hai aalam tiri angḌa.i ka
tere didar se mahrum rahin jab ankhen
koi masraf hi nahin phir miri bina.i ka
alam-e-gor-e-ghariban ka ye ghamnak sukut
ik namuna hai mire dil ki shakeba.i ka
niind un ki agar uḌ jaa.e to kuchh duur nahin
so gaya jagne vaala shab-e-tanha.i ka
sher dilkash ho agar saf.ha-e-kaghaz pe ‘aziz’
ik muraqqa.a hai kamal-e-suḳhan-ara.i ka
Leave a Reply