kyuun aap ko ḳhalvat men laḌa.i ki paḌi hai
milne ki ghaḌi hai ki ye laḌne ki ghaḌi hai
kya chashm-e-inayat ka tiri mujh ko bharosa
laḌ laḌ ke mili hai kabhi mil mil ke laḌi hai
kya janiye kya haal hamara ho shab-e-hijr
allah abhi chaar pahar raat paḌi hai
talvar liye vo nahin maqtal men khaḌe hain
is vaqt mire aage miri maut khaḌi hai
jiine nahin dete hain vo marne nahin dete
ai ‘nuh’ miri jaan kashakash men paḌi hai
Leave a Reply