kya maza ho jo kisi se tujhe ulfat ho jaae
ji kudhe fikr rahe meri si halat ho jaae
tera bimar dam-e-naza ye mange tha dua
dekh luun phir use gar thodi si mohlat ho jaae
jaiyo mat tu saba baagh se zindan ki taraf
mujh ko dar hai na asiron pe qayamat ho jaae
ai dil ik din tu guzar kar taraf-e-ahl-e-qubur
ta-ki dekhe se unhon ke tujhe ibrat ho jaae
dekh tasvir ko majnun ki ‘havas’ rashk na kar
chahiye ishq men teri bhi ye surat ho jaae
Leave a Reply