Nashtar Khaanqahi
kya ḳhabar hai na mile phir koi shisha aisa
ḳhud ko chhute hue Darta huun shikasta aisa
sabza-e-lams pe baḌhta hua lamha lamha
sust-rau sho.ala-e-tufan-e-tamanna aisa
ab na dastak men sada hai na hai zanjir men shor
band ab tak na hua tha dar-e-tauba aisa
saans ke saath lapakta hai tah-e-mauj-e-ḳhayal
kis ne boya tha mire jism men sho.ala aisa
sar se Tapka jo shajar ke to zamin bhi na mili
ab ke ik barg-e-javan shaḳh se TuuTa aisa
aks ko naqsh to jazbe ko karun para-e-rang
kal ke a.ine se jhankega na chehra aisa
ab to zanjir-e-ta.alluq hai na vo rishta-e-dard
main vo ḳhush-baḳht ki paaya hai zamana aisa
Leave a Reply