kya kahin milta hai kya khvabon men
dil ghira rahta hai mahtabon men
har tamanna-e-sukun-e-sahil
uljhi uljhi rahi sailabon men
dil-e-insan ki syahi tauba
zulmaten bas gaiin mahtabon men
aap ke faiz se tanviren hain
kaaba-e-ishq ki mehrabon men
apna har khvab tha ik mauj-e-surur
yuun hui umr basar khvabon men
husn-e-qismat se hamesha ‘fitrat’
bakht bedar raha khvabon men
Leave a Reply