kya kahen tum se shab-e-gham ham pe kya kya ho gaya
dil pighal kar bah gaya paani kaleja ho gaya
zikr-e-chashm-e-mast se mera ḳharaba ho gaya
mai-kade tak bhi nahin pahuncha ki rusva ho gaya
mujib-e-ḳhiffat hai aalam men tajarrud-peshgi
main subuk-sar-e-mohabbat ho ke halka ho gaya
jalva-e-ahl-e-safa hai tira-baḳhton par vabal
din jahan nikla ki murgh-e-shappar andha ho gaya
arsh-e-a.azam par rahe kyunkar na majnun ka dimagh
lailat-ul-me.araj rang-e-zulf-e-laila ho gaya
ḳhvab men bhi hai tasavvur shoḳh-chashmon ka hamen
bistar-e-aram apna mirg-chhala ho gaya
in pari-zadon ke kuche men tamashe ki hai baat
jo tamasha dekhne aaya tamasha ho gaya
Leave a Reply