Abrar Ahmad
kya janiye kya hai had-e-idrak se aage
bas khaak hai is teri miri khaak se aage
hai shor-e-fughan khamushi-e-marg ke pichhe
ik tez hava hai khas-o-khashak se aage
ham dekhte hain aankh men sahme hue aansu
ik chup hai kahin khanda-e-be-bak se aage
ik rang sa hai rang-e-tamanna se mumasil
ik abr sa hai dida-e-nam-nak se aage
main apne kisi khvab ki munh-zor hava men
aksar hi nikal jaata huun aflak se aage
kya shor karen girya-e-usshaq se badh kar
kya zor karen pairhan-e-chak se aage
Leave a Reply