Devmani Pandey
kya chaha tha kya socha tha kya guzri kya baat hui
dil bhi TuuTa ghar bhi chhuTa rusva.i bhi saath hui
vo kya jaane us se bichhaḌ ke ham par kya kya guzri hai
sahra jaisa din ka aalam parbat jaisi raat hui
us ke ḳhat ko kaise paḌhun main saare lafz to bhige hain
meri chhat par badal chha.e us ke ghar barsat hui
yuun kho.e ham yaad men us ki goya ḳhud ko bhuul ga.e
kisi ḳhabar hai kab din nikla kise pata kab raat hui
dil ke pyase angan men kal yaad ke badal yuun aa.e
der talak ye tan-man bhiga be-mausam barsat hui
Leave a Reply