Rajendra Nath Rahbar
kya aaj un se apni mulaqat ho ga.i
sahra pe jaise TuuT ke barsat ho ga.i
viran bastiyon men mira din hua tamam
sunsan jangalon men mujhe raat ho ga.i
karti hai yuun bhi baat mohabbat kabhi kabhi
nazren milin na honT hile baat ho ga.i
zalim zamana ham ko agar de gaya shikast
baazi mohabbaton ki agar maat ho ga.i
ham ko nigal saken ye andheron men dam kahan
jab chandni se apni mulaqat ho ga.i
bazar jaana aaj saphal ho gaya mira
barson ke ba.ad un se mulaqat ho ga.i
Leave a Reply