Tariq Koi Na Aaya Mujhe Zamane Ka

tariq koi na aaya mujhe zamane ka

ki ek sauda raha jins-e-dil lutane ka

fareb-e-khvab mire raste ko rok nahin

ki vaqt-e-sham hai ye gham-kade ko jaane ka

tire vajud se pahchan mujh ko apni thi

tira yaqin tha mujh ko yaqin zamane ka

kharab-e-ishq huun khud maut huun main apne liye

sikha rahi huun hunar khud ko dil jalane ka

har ek shakh-e-sitam se main phuul todti huun

hua hai shauq chaman-zar-e-gham banane ka

nasha ajiib hai is jang-e-be-samar ka mujhe

khumar khuub hai khun-e-khirad bahane ka

shab-e-visal men ik nuqta-e-tavaqquf huun

aur ik junun hai use manzilon ko paane ka

dil-e-tabah ko be-dam bech deti huun

ki karobar hai ye jins-e-gham kamane ka

mujhe aziiz hai be-ehtiyati-e-sada

na shauq hai na hunar us ko azmane ka

qafas badan ka mujhe kuchh mira subut nahin

ye tair-e-dil-o-jan laut kar na aane ka